خيط عنكبوت ، بقلم / إلهام شحاتة

فى عتمة الليل

والسكوت

طل النهار

فوق البيوت

والحزن كان

مش محتمل

مكتوب لى اعيش

أو حتى اموت

والضلمة كانت -

خيط طويل

للعنكبوت

عشش على كتاف النهار

قفل الشروق

كل البيبان

والحزن واقف ديدبان

والجرح نازف ع الحيطان

دايس على كتاف الأمل

ايه اللى فاضل مننا

غير الحكاوى الميتة

والذكريات

الحب مات

والماضى فات

ولسانى جوه الحلق

مخنوق بالسكات

أصعب معادله

باخوضها من

زمنى اللى فات

اخرس واموت

واحفظ رفاتى من السكات

وللا انتفض

واصرخ فى وش الموت

بترتيل البنات

مايهمنيش

ان عشت يوم

او حتى اموت

قلبى اللى نابض

بين ضلوعى -

بالهوى

رفض السكوت

ولسانى جوه الحلق

خايف م الكلام

شىء مستحيل

مش محتمل

ياهلترى

يقدر يفوت -

النور ويحرق ف الظلام

ويشق قرص الشمس

صدر الليل

ويخرج للحياه

من قلب موت

لمس الشعاع

شوق الوتر

وقت الصباح

والفجر لاح

اغسل همومك

ياأنا !!

واركن كتافك ع الضيا

يمكن اذا انتاب الشعاع

رعشة أمل

اخرج انا

من لهفتى

للدنيا وانسى بالأمل

كل الجراح

امسح بمنديل البراءة دمعتى

جفف بحور الدمع من

جوه العيون

لجلن تعود

مصر البهية من جديد

" هيه دى هيه

فرحة الدنيا

دق ياقلبى

غنى ياعنيه "

غنيها واعزف لحن حبى

للبلد

!!

-----------------------------------

من ديوان

انا عاشقة

للشاعرة

الهام شحاتة سالم

----------------------------------------