فين الحق ؟ **بقلم : منال عفيفي
الحيره صبحت مكتوبه
والكلمه دايما مغلوبه
والصوره باهتة ومقلوبه
وشفنا فيها الوش اتنين
و السكه بيننا مش واضحه ؟
والفكره تايهه أو سارحه
ولإمتى هاتموت الفرحه ؟
والحزن فينا بقاله سنين
والكلمه فى حلوقنا بتبكى
مش قادره تخرج ولا تحكى
على حالنا والكل بيشكى
ولاحد عارف رايحين فين
ماتيجوا ع الحق ندوّر
بلاش نلطش ونعوّر
دا العقل بالفكر ينوّّر
والحق يظهر دنيا ودين
ليست هناك تعليقات