حروووف الرضى ******* رضا أبو الغيط
انا لما أتألم بتعلم
اكتب بيت شعر
وإن شعري ما علم واتألم
وسقاني المر
أبدأ من تاني احزاني
واخلي الكلمه ف وجداني
من تاني تمر
علي دفتر محفور جوايا
ودوايا ..من دمي الطاهر
مليانه بضميرى الحر
وأتأمل ف الحرف الباهت
والساكت عن قولة لأ
والكلمه المحشوره ف زوري
والساكته عن قول الحق
وازق الخطوه اللي ماراضيه
تتحرك شبر
واصرخ ف ديواني المدارى
ف حروف الجر
وأفر لأوضتي المقفوله
بترباس الهم
وألم الحزن المتنطور
فوق السجاجيد
واغزل به قصيده ونتقابل
من غير مواعيد
ف قلوب مخنوقه من الغربه
وكلام موجوع
ف عيون غرقانه من التوهه
في شجن ودموع
وأبدأ من تاني بكياني
أتأمل ف كتاب رباني
علي حب الشعر
وان شعري ما اثر ف العالم
او بكت اوجاعي الظالم
أرجع اتألم ...واتندم
وأوراقي تمسك ف خناقي
من كتر الخوف
واطوف بالسطر المستني
يفرح بحروف
من شاعر عايش ع الهامش
من كتر الشر
موجوع بالجوع المضفر
بكاسات المر
*****************************
رضا أبو الغيط
ليست هناك تعليقات