الشيب مش عيب بقلـــــــم/ ياسرعيد
الشيب مش عيب
عمر الشيبه ما كانت عيبه
مهما تزيد فيها التجاعيد
مهما سواد الشعر يروح
أو تلقاه إتحول فضى
بس العيبه لما بتلقى
واحد كده من دور أحفاده
فى المواليد
يكسر فيه بسهوله الهيبه
بجد مصيبه
لما يحس ف شيبته ربيع
عايش فيه
وبيتوضى من أيامه
المليانه ف أبريق عمره
بالأحلام
ويا ألام
ينوى صلاته لفجره الجاى
وجوه عنيه أحلام وطموح
وجاى بيقوله بكل بجاحه
إن صلاتك مش مقبوله
وقتك أصله عدا وفات
واحنا اليوم بنصلى عليك
وهو يرد بكل سماحه
يقوله البركه ف عمرك يابنى
وقتنا عدا وبكره دا ليك
بس ياريتك يابنى ماتنسى
وجهز نفسك
ماللى بتعمله فيا اليوم
بكره اكيد راح يحصل فيك
أصل الشيبه وقلة حيلتى
مش بإديا
دى سنه وعاشها الناس من قبلى
ووصلت ليا
وبكره أكيد هاتمر عليك
وبعد الدنيا ماتسرق منك
كل سنينك
وتهد ف حيلك
تدور تانى ف كل دفاترك المركونه
عن حد ف يوم كان واقف جنبك
عامل منك
ياخد إيدك
هاتحس ببرد شديد فى الدنيا
فى عز بؤونه
واوعى تسلم يوم للوهم
لايكسر ضهرك
ماتخليش الدنيا تغرك
وانت لنفسك بس حبيب
عمر الشيبه ماكانت عيب
الشيب مش عيب
ليست هناك تعليقات