ميت سنة ورا)) .. كلمات المهندس: خالد محمد

قالولي فيه اختراع اسمة آلة زمن ..
تلف بيها التاريخ ..
تشوف حال الوطن ..
قلت بلاش سخافة ..
ده كلام مالوش لا معني و لا تمن ..
بقي ممكن ارجع أنا ميت سنة ورا ..
و اقدر اعرف مثلا حصل زمان ايه و جري ..
قالولي لو مستغرب .. تعال جرب .. يلا قرّب ..
انا قلت هخسر ايه .. أما أروح الآلة و أركب ..
و أرجع و أشوف الناس زمان ..
كانت صحيح بتخاف علي بعضها ..
و الا زي النهاردة الناس بتاكل بعضها ..
و بسهولة تخسر بعضها ..
و عشان أي حاجة تبيع شرفها و عرضها ..
قلت أشوف كمان كان بينهم لين و رحمة ..
و الا زي الزمان ده كله ضلال و افترا ..
و خدت بعضي و رجعت ميت سنة ورا
لقيت الوشوش سِمحه .. مليانة عطف و طيبة ..
و لا كلمة كانت جارحه .. و لا حد بيقول عيبة ..
حتي الرجولة رجولة .. مش منظرة او بطولة ..
الرجولة كانت كلمة .. مش عضلات و مفتولة ..
كان اللسان لو وعد كأنه باع و اشتري ..
يارتني آآآه ما رجعت ميت سنة ورا
كان الاحترام موجود كان الاحترام مبدأ ..
كان السلام بيسود و الكل بيه بيبدأ ..
و الست كانت باحتشامها ..
بتجبر الناس تحترمها ..
لا شفت واحده بسترتش .. و لا واحده لابسه ميكرو جيب ..
و لا شاب صايع ميستاهلش .. بتركب معاه في عربية جيب ..
لا فيه تحرش و اغتصاب و لافيه خلاعة أو عُرَي ..
يارتني آآآه ما رجعت ميت سنة ورا
ضربت كف بكف ..
هو احنا ايه حصلّنا ..
بقينا و لا الف صنف ..
و نسينا ليه أصلنا ..
ضاعت مننا النخوة ..
صارت مشاعرنا رخوة ..
و بعدنا عن اخلاقنا ..
ييجي الف مليون خطوة ..
يا خسارة علي شبابنا ..
يا خسارة علي اللي صابنا ..
علشان نرجع لتوبنا ..
عايزين كمان ميت سنة ..
انا قلت مش راجع زماني ..
أنا عايز أفضل هنا ..
هو اللي شاف بعينه زي اللي سمع و قرا ..
يارتني آآآه ما رجعت ميت سنة ورا