لو راح نكتب شعر أنا وانت*بقلم / هاني عبد الوهاب

هدهد سليمان

أنا ... وأنا
لو راح نكتب شعر أنا وانت ..... مش لازم نشتم ونعادي
زي ما مصر بلادك برضو ..... مصر حبيبتي وهي بلادي
ممكن نتألم أو نغضب .... ممكن نزعل .. نبعد.. عادي
لكن مش ممكن ندبحها ... ونشمت في بلدنا أعادي
*********************************
راح نقسم فرحتها ما بينا .... والدمعه هتمسحها ايدينا
واللقمة الموجوده كفاية .... أحمد هيحافظ علي مينا
مش هنسيب السور يبعدنا ... ولا هنفرط لحظة ف سينا
*********************************
بص لصورتك راح تلاقيني ..... وف صورتي ملامحك بلاقيها
نفس اللون والضحكة الحلوة .... نفس الدمعة اللي مخبيها
حتي هدومي وحتي هدومك ... ريحة مصر حبيبتك فيها
**********************************
ممكن اعتاتبك أو تعاتبني .... لكن مش ممكن راح اسيبك
ممكن احاسبك أو تحاسبني .... تقبل عيبي وهأقبل عيبك
تفضل مهما بيجري حبيبي .... وأفضل مهما بيجري حبيبك
***********************************
ايه الفرق ما بين اخين ..... نفس الدم ونفس الدين
دا احنا بنفهم بعض بنظرة ... لو تشاور لي بطرف العين
دا احنا جميعا أولاد تسعة .... دا احنا جميعا مصرين
************************************
بقلم / هاني عبد الوهاب