يا سهم سور المدرسة.... بقلم الأستاذ سامح لطف الله

يا سهم سور المدرسة

يا سهم سور المدرسة

إحكيلي عنه وقول عليه

لمَّا عديت من رقبته

فتحت جرح ينز ليه؟

يا سهم سور المدرسة

شرب العصير اللي ف إيديه؟

أو خدت روحه منننا

ولسه نفسه يا عيني فيه؟

السطر لسه ع الورق

حروفه لسه بتناديه

دا المبتدا وفين الخبر

ينزل خبر والنعي فيه؟

يا سهم ليه نقيت حياته؟

في لحظة الغدر السفيه

مين صنَّعك مين قطَّعك؟

مين ثبتك في السوردا ليه؟

يا سهم سور المدرسة

رافع ف راسك فوق لمين؟

مستني تخطف روح زميل؟

نفسه عصير هيبل ريق

أو لقمة هتسد الرمق

أو مية هتطفِّي الحريق؟

يا كل مين في المدرسة

أكبادنا سايبينها لكم

شيلوا السهام من قلبهم

حطوا العلوم والهندسة

سيبوا البيبان متفتحة

خلوا العقول متفتحة

العلم مش هيحوشه سور