ولا يهمك .....بقلم أ بـــو عــمــــــــا ر ا لــــمــصـــــــــــــر ى
ما يهمكيش
مش كل سلاح يقدر ..يقتل
دى السنبلة لسة بتضحك
مع إنها ....شايفة المنجل
يا م الغناوى الطيبة ف قلب الصحارى
والشجر طارح مواويل
متخافشى يا نيل
كان مين قدر مرة
يعكّــر ميتك ؟
كان مين غدر بك راح سليم ؟
كان مين قدر مرة يلف المشنقة
حوالين شطوطك ؟
ما يهمكيش
أنت الحكاية كلها
وانت الكتاب
وانت الفراشةبجناحات من نور ونار
ولاشوك فى وردة يخوّفك
ولا يوم هربتى م المطر
السحلفة ..طول عمرها
تعافر....و تكتب إسمها
فى سباق مسافاتك.
والقمر ..لو يوم حضر
تهرب نجوم الليل الكدابين
وعصا موسى
تكسر سيوف الخيالة
وآية واحدة من القرآن
تطرد وتحرق
ألف شيطان
ولا يهمك
الحزن من قلبى بيخرج
على قلب ناى
يطلع نغم
عاشق هواكى و تقاسيمك
ودموع ولادك ..
حترسم طريق بكرة
شيلى الدموع من مناديلك
الصبح جاى
والندى ..حيبل ريق أوراق الورد
وسماكى حتى لو بكت
دموعها بتفرح أرضك
وتخضّـر ليلك ونهارك
شيلى الوساوس يا حبيبتى
من أفكارك
ما يهمكيش
الصبح جاى
والفجر سابقه بالآدان
والشمس حترش الدفا
فى عروق شوارع بردانة
وتكسى أرضك بالعيدان
تطرح سنابل فى الغيطان
متخافشى من حد المنجل
متخافشى من سجن السجان
ليست هناك تعليقات