بقلم أ بــو عــمــــــا ر ا لــمـــصـــــــر ى...إ فــــــــــــــــــــر حـــــــــــــــــــــى
إ فــــــــــــــــــــر حـــــــــــــــــــــى
سايق عليكى الأوليا
تقومى وتمسحى دمعتك
دى نازلة نار
على قلب قلبى بتحرقه
مقطّـعة شريانى منى م الوجع
على ميت طريق وميت رصيف
بتفرقه
سايق عليكى الأنبيا
ما تسلميش للضلمة يوم
لو باقية شمعة ف جتتى
وبنارها حتنز ف هموم
حستحمل النار والوجع
وانت بنورها تفرحى
تتونسى
تدّفّـى على حرقة جراحى وجتتى
واقلع عيونى تشوفى بيها فرحتك
وانزع أنا جلدى اللى ساتر جتتى
وانت يا غالية........ تتكسى
سايق عليكى الرقوة وبخور الحسين
والسيدة
لا تقومى وتكيدى العدا
كنا احنا فين ..وأنت فين ؟
لما حملتى همومنا فوق كتفك ينين
ولا يوم بكيتى أو شكيتى م الألم
ولا يوم عملتى معددة
يا مؤمنة يا مريمية و طيبة
يا مسبّـحة و موحدة
ليه كل دة ؟
سايق عليكى الدم سايل ع الطريق
لاتطفى باديكى الحريق
وتكونى زى ما كنتى دايما
طوق نجاه
وتلملمى كل الجراح
وتفتحى شمس الصباح
وترجعى الحلم اللى تاه
يا كل طلعة شمس من نور الإله
يا حبي من يوم مولدى.ليوم منتهاه
سايق عليكى كل رقعة ف جتتى
سايق عليكى كلمتى
وحرفى سطورى التايهة منى ف د نيتى
مش نزف قلمى ..صدقينى
دة نزف دمى...... ودمعتى
موجوع أوى دمعك ...حارقنى باأوى
عايز أصرّخ ..أسمعينى وقربى
صوتى خلاص ..ضاع فى الرصاص
واللى باقى لى ..
نبضة بتعافر عشانك
إسمعيها والنبى
سايق عليكى
كل دول لا تفرحى
وتفرّحى
دمى الطرى
لساه ماجفش زى ما هو ف مطرحى
لساه ماجفش زى ماهو ف مطرحى
ليست هناك تعليقات