التعويذة : بقلم / طارق العجمى

التعويذة

لموا الضحايا فى أكفنه
 وإمسحــــوا
 دم العيال من ع الطريق
 وماتسيبوش
 نفسى العزيزه تنكسر
 وهى لسه معشمه
 فيكوا لمصيرها تكملوا
 وماتتركوش
 حلمى اللى مات من غير سبب .؟
 حقوا يضيع وسط الكلام
 صحوا الضمير من غفوته
 وماتسكتوش
 بالفعل قوموا وإعملوا
 وماتخونوش إنسان فرض رأيه
 على الأمة العظيمة والوطن
 وماتكتموش
 سر اللى عايز صرختوا
 جوه جوفه تنفجر
 ودوروا ع المفقودين
 ليهم اهالى بيسألوا
 وإبقوا إنشروا خبر .. يقين!
 ع اللى عيالوا إتقتلوا
 وسط المذابح فى الميدان
 لأجل لقمة تسدجوعهم
 أو سكن ..
 أو حتى عشه
 تستر البنت اللى حيلة أهلها
 وتلم حال الى إعتمد
 على قمح محمى بقبة طين
 وإن شفتوا يوم
 دمعه غريبه مؤمنه
 عايزه تصلى فى الحرم
 مالهاش مصير
 غير البيوت الآمنه
 إوعوا تقولوا الإعتكاف
 جوه بيوت الله حُـــرُمْ
 وإن يوم لقيتوا الميته
 شايله جنينها بيتحنى
 عايز يشوف الدنيا قبل
 الدود ماياكل لحمُه نى
 يبقى واجبكوا تكملوا
 سر اللى قال فى قدرتوا
 يخلق فى ميت قلب حى
 وإبقوا إمسحوا
 دمع الغلابه
 بإيد ماليها الخير قوى
 وإكفوا نفوس الشر دايماً شرها
 ماتطمعوش فيكوا لفقير
 لو كنتوا يعنى ..؟ أغنيه
 ....................................................
 يارب إحفظ مصر . وإنصر الحق