الهام شحانه سالم........نـــــزف القـلـــم
عزف الولد لحن الأمل
كل العصافير زقزقت
واللحن وف عز انتشار - روح النغم
رسم الوتر
شكل الجميلة ف كلمتين
بنوته أجمل م القمر
خجل القمر من ضيّها
كتب القلم بين السطور
أجمل حكاية عشق فى-
الزمن الجميل
أصحى وافوق
واجمع فتافيت الصور
وابنى المدينة الفاضلة من غير رتوش
وانقش على باب المدينة
القلب والسهم - المسافر فى الخيال
لجلن يكون
دستور مدينتى الفاضلة
مبنى على العشق الجميل
اسرح مابين الدايرتين
واحلم وافوق
القانى تايه بين -
شعور الليل
على كتاف الزمن !!
( ياليل .. ياعين )
موال باقوله -
فى عز ليل الغربة
والسهم انطلق
نشرت فى قلب الحلق
علقم غربتى
أنا مين وليه ؟!
عايش سنين
العمر تايه جوّه دوامة القلق
الدمع سال
والدم أصبح شىء جديد
والعين بتبكى دموع ودم
ياغربتى
موالى تاه
فى الزحمة وانهار الامل
حتى المدينة الفاضلة
كانت خيال
وصحيت لقيتنى غصب عنى
كنت واقع فى الغرق
ليست هناك تعليقات