للشاعر : أحمد أبوشرخ\\" عمي عبد الحي.... حي "
عمي عبد الحي.... حي
ياللي رايح .. ياللي جي
عمي عبد الحي فارش
في الشوارع عـ المفارش
بالتاريخ يروي حكايات
عن ولآدنا اللي ماتوا
وسطروا أحلي بطولات
واللي ضحي بأحلى عمره
واللي ساب أهله وفات
بس ساب لهم المصانع
بالمكن شغال وداير
واللي تحت تروسه يطحن
اللي خاين واللي غادر
وعمي عبد الحي
يروي في الحكاوي
عـ اللي ساب لينا المزارع
اللي فيها النخل طارح
واللي فيها النهر يروي
عزم في ولآدنا اللي طالع
يبني بلده بانسجام
يبني ويعلي المآذن
في المساجد والكنايس
يبني أبراج الحمام
ومادنة للمدفع توازن
في الحروب لجل السلام
وعمي عبد الحي سارح
يروي مـ النيل الحكاوي
زي فنان المسارح
كل ليلة يبقي راوي
ليلة يبقي أديب وشاعر
وليله يعمل فيها حاوي
ساعة بيهز المشاعر
وساعة يبكي في الغناوي
يسعد الجماهير بفنه
وهمه ساكت جوه منه
وعمي عبد الحي داير
بالتاريخ ينقش ستاير
عـ الجداير
وعـ القهاوي
يقول حكاوي
عن تاريخ أبطال وماتوا
لجل نحيا
ويبقي فينا عمي يحي
ويروي تاني للزمان
يحكي قصة نور ومحي
اللي ماتوا في الميدان
وعمي عبد الحي يروي
في الحكاوي عن حروب
وعن بلاء
عشنا فيها سنين طويلة
لما حققنا الجلاء
يحكي قصة كربلاء
يحكي عـ الفسدة اللي خانوا
واللي خلقوا ألف داء
واللي ذلوا الناس في قوتهم
ونزعوا منهم الانتماء
لجل ما يمرض وطنا
وحتى ما نلاقي الدواء
وعمي عبد الحي يحكي
للولاد الطيبين
يحكي ليهم كل ساعة
عن باهيه وعن ياسين
عن ياسين المعجباني
اللي سطر صفحة بيضة
جوا صفحات الأنين
بالسلام أنقذ باهيه
من أيادي السفاحين
اللي ذلوا كتير ولآدها
تلت قرن من السنين
عمي عبد الحي ناوي
يبدر الخير في الحكاوي
ويروي م القلل القناوي
بالهنا كل الشباب
يبقي فيهم نبت أخصر
في الأصيل يطرح ويكبر
وسم يهري في الكلاب
اللي بيخونوا ف بلادهم
واللي ماشين في الخراب
عمي عبد الحي ناوي
يزرع الأيام حكاوي
ويرويها بدم الشباب
اللي زاح عنها بلاوي
عشنا فيها سنين هباب
تطرح الأرض العفية
ولآد أبية
للمذلة وللعذاب
وعمي عبد الحي...حي
في المنازل و الحارات
عمي عبد الحي صاحي
في المدن وفي الضواحي
ومش ها يسكت علي اللي جي
زى ما سبش الي فات
ليست هناك تعليقات