إعدام ميت : بقلم / طارق العجمى
قصيدة / إعدام ميت ... للشاعر / طارق العجمى
..............................
::::::::::::::::::::::::::::::
بيعلمونى الحرج
والصبر ع الأزمات
وبيرسمولى الفرج
ع الحق لو يوم مات
وبيرصفولى طريق
لو مات ضمير الناس
ويقولوا بعد الضيق
راح ترجع الأنفاس
,, وادينى على حالى
اعمى ومانيش شايف
احلامى قدامى
واليأس بعمينى
وبخاف آخد خطوه
لا خوفى يكفينى
واقتل فى شئ ميت .؟
""
وافضل اشاور
على حلم بات منسى
جوه عيون الزمن
واقول مسيرى اطول
مادام فى جوفى نفس
ومادام الحلم الحى
يبقى فى لسه أمل
هامشى وهاتحمل
يمكن الاقى ضى
لاكن فى ناس بتغول
وبيقتلوا المقتول
وبيعدموا فى ميت
أهلوا غلابه موت
دول ميتين م الجوع
والصبر فى الملكوت
حلموا ضعيف جداً
بيموت فى كل شروق
والفجر لو يدن
تلقاه يكن مشنوق
وغصب عنى بفوت
وسط الحديد والنار
و ان مره شفت الموت
أسكت واقول أقدار
وان حقى يوم اتهان
مابشوفشى ليا حقوق
وبقضى يومى جعان
وببات وانا محقوق
واصحى واروح شغلى
شايل هموم وطنى
دمى يبات يغلى
م اللى اضطهض حقى
واخد سلاحى واروح
على حدود وطنى
ظهرى لأرض بلادى
ووشى لعدوى
شفت الرصاص الحى
بيخونى فى ظهرى
يبقى اللى خانى قريب
ودموا من دمى
لاكن قتل ميت
أياموا معدوده
وأحلاموا بتعيط
على نفوس سوده
كات فرشته رمله
والبطانيه مداس
وبيادته مربوطه
وعنيها فيها نعاس
والخوذه مخنوقه
طول النهار ع الراس
واللى اغتصب دمه
مالوش عزيز فى الناس
كان نفسى يوم افرح
بدبله حتى نحاس
ابويا قالى تعود
ونجوزك فى قصور
نفرح فى وسط الخلق
بزفتك فى النور
لاكنى مت شهيد
وعند الإله الحور
""
وعند الإله الحور
.............................
ليست هناك تعليقات