الي روح كل شهدائنا الشباب ، بقلم / محمد الشرقاوي‏

قبل الفرح

قبل الفرح بيومين

الزينة منصوبة

والجيران متجمعين

الستات في اوضة العروسة

بيطبلوا ويغنوا مهيصين

والرجالة قدام الدار متجمعين

بيهموا ابويا واخواتي فرحانين

صواني الشربات اهي دايرة

والاغاني ملعلعة

والجاتوهات والحلوي

قبل الفرح بيومين

وانا يا امي بحلم

اخذ مراتي علي عشنا

نعمل عيلة ونخلف لنا عيلين

قلبي طاير من الفرحة

اصله حلمي من سنين

ودي بنت عمي

هي حبيبتي

مين حيلم لحمنا غيرنا

ياأمي مين

قالوا الصحاب الاربعة وعشرين

يلا بينا نجيب شهادتنا

محنا خلصنا خدمتنا

وبقينا مدنيين

ولو بلدنا احتجتنا

نفديها بالروح والعين

والله ياامي كنا سلميين

لا معانا سلاح ولا مخونين

ولا علي اي حد حاقدين

مشينا واحنا مش خايفين

معرفناش ان بني الانسان

متوحشين

طلعوا علينا الانذال المتأسلمين

مصوا دمنا وشربوه متلذذين

وفاضت ارواحنا ياامي راحت

لخالقها العظيـــــــــم

بس وهي طالعة كانت بتصرخ

بتسأل

ليه قابيل قتل هابيل

ليه قابيل قتل هابيل

ليه قابيل قتل هابيل