بحبك والله يابلادى / شعر الهام شحاتة سالم
بحبك والله يابلادى
وحبك فى الوريد سارى
وباعشق كل شىء فيكى
وتارك م العدا .. تارى
بحب الشمس لو حتى
هاتحرق زرعتى وخيرى
واحب ترابك الغالى
واشيد من هواه دارى
واحب اسمع غنا قلبك
يغنى لى ويشجينى
واحب امشى ف شوارعها
واروح بالخطوه وارجعها
واجيب السكة من تانى
ومهما اتوه فى حواريها
اتوه وارجع .. تضمينى
سنين الغربة تبعدنى
ومهما ابعد واتوه عنك
الاقينى
فى آخر الرحله بارجع لك
وعمرى ما كنت وحدانى
لانك ساريه فى كيانى
ولما تضيق كده الدنيا
واعيش تايه فى أحزانى
تضمينى .. تعيدى البسمه
لعيونى
ولو ضى القمر سافر
وخيّم ع البيوت الليل
تكونى الفجر فى قلبى
أعيش أجمل نهار فيكى
كتبت الشعر فى عيونك
كتاب .. ميه .. وألف كتاب
ولو مليون ما هايكفّى
عشان أوصف هوى الأحباب
أسيبك ليه ؟؟
واروح على فين ؟؟
ياست الكل ياامايا
وانا من غير عبير حبك
أموت وتموتى يا منايا
ومهما الغربه تبعدنى
أنا راجع لأحضانك
ليست هناك تعليقات