مسحراتي ثورة يناير ، بقلم / احمد ابو شرخ

مسحراتي منأراتي في البلد دوار

الرجل بتدب مطرح ما بتحب

وأنا حبيت وإندبيت وفي الآخر

طلعت حمار ..؟؟؟

تلاتين سنه داير أنادي داير

أطبل قلوا مخبل عمال يهبل

هاتوه في النار

وإصحي يانايم وحد الدايم

رمضان كريم

***********

وكرمه زايد علينا فايض

وعام جديد

تلاتين سنه ومصر ساكته

عن الحديت

مش قادره تنطق ودايره

تحجل بقيد حديد

ربطه رئيسها إللي حارسها

ويزل فيها في كل يوم

وف كل عيد

الدنيا ماشيه وهي واقفه

رجعت بعيد

وراح رميها في سجن تيهه

أسواره عاليه وابواب حديد

فاهم إنه سادها وركب ولادها

وبقوا عبيد

قال آيه تكيه وإحنا الرعيه

وهو اللي سيد

إصحي يانايم وحد الدايم

رمضان كريم

***********

وقول نويت أشوفلي بيت

أداري فيه يكون بعيد

ده باللي عمله ماإكتفاش

وداير يزيد

نسي ضميره وبعنا لغيره

للقريب وللبعيد

باع الصانع - باع المزارع

ولإبن عز باع الحديد

وغازنا باعوا لإسرائيل

وتوشكا باعها للوليد

قال مصر ماتت ماعدتش

قايمه تاني من جديد

ونا اللي فيها هفضل أغني

وأقول وذيد

ولما هفضي هبنيها لبني

وأسيبها تاني علي الحديد

عشان يكافح من تاني زيي

ويرجع يعيد

واصحي يانايم وحد الدايم

رمضان كريم

************

وقول نويت يكون سلاحي

هو نجاحي وبدأ كفاحي

من كل مصنع - من كل غيط

جمال عبيط صدق أبوه

راجل غبيط

د مصر مارد في لحظه هاجت

زي المحيط

وولادها طلعت من الشوارع

من كل حاره - من كل بيت

كسرت قيودها ونزعت حقوقها

من اللقيط

أصل اللي خانها ماكنش منها

لازم خليط

وولادها ثارت أخدت بتارها

وف يوم حداشر قصوا الشريط

لعهد أبيض وشمسه طالعه

وكل يوم هيبقي عيد

وإصحي يانايم وعيش ل بكره

في مصر بيضه ولابسه توبها

أخضر جديد

وإصحي يانايم وحد الديم

رمضان كريم

واحد الرزاق ...

------------------------