نزف الجريد ، بقلم / ناجى عبد المنعم

نزف الجريد

شعر

ناجى عبد المنعم

**************

لو حولوك مليون غراب

اثبت وكمّل عشتك

جمّع خيوط القش وابنى ع الجريد

بيت من حديد

يتحدى ريح الولوله

لو جوزوك البومه .. لو

حطّوا ف ايديك كل السلاسل

والقيود

قول كلمتك

لو فرّقك جمع الشتات

أو جمّعك نوح الرفات

لو حرّقوا الريش اللى فارد

ع التابوت

او عاك تسلم للسكوت

لو علقوك فى المشنقه

اوعاك تموت

ازعق ياعصفور الكنارى بالاّدان

خلى الودان تصحى وتسمع كلمتك

اوعاك تفوت فرصتك

غنى على شط الجميل

غرّق تراب الكون بلح

الأرض عرضك

اوعى جلدك ينسلخ

نفض جبين المدنه من

سجن الشبح

رفرف وطير واملى السما

تغريد وبحّر فى السحب

وادخل فى قرص الشمس

واعلن كلمتك

رفرف وعلّى كلمتك

فالصمت مش طبع النخيل

املى القلم

من دم جزع النخله –

وارسم ع التراب

شكل الخريطة من جديد

يبدأ طريق النزف من –

فوق الجريد

ينزف بلح

**************************

من ديوان ( نوبة جنون )

للشاعر

ناجى عبد المنعم

**************************

نشرت هذه القصيدة فى الرسالة 98 –

الجمهورية 98 - أخبار الأدب 99 - أحسن

الأشعار99 – رحيق العامية 99 – العروبة

2000 – عيون 2000 – الجزيرة 2001

************************************