رسالة إلى كل إنسان محبط فى العالم ، بقلم / هناء نوار

هذه رسالة إلى كل إنسان محبط فى العالم ..

(غمض عنيك و امشي بخفة ودلع .. الدنيا هى الشابة و إنت الجدع .. تشوف رشاقة خطوتك , تعبدك .. لكن إنت لو بصيت لرجليك تقع )

دا الكلام اللى إحنا طول عمرنا ... بنسمعه و مش فاهمينه .

إسمع بقة نصيحتى يا صاحبي واعمل بيها .. وصدقنى مش حتندم

إوعى تتضايق !! ما تخلّيش أى حاجة فى الدنيا تعكنن عليك عيشتك و تمنعك من إنك تتلذذ بكل متع الحياة .. مفيش أى حاجة تستاهل إنك تزعل علشانها .. و لا في أى واحدة تستاهل إنه يتبكى عليها !! ارمى كل الهموم ورا ضهرك .. فكر دايما فى بكرة ..

و إنسي إمبارح .. لأنه خلاص أصبح ذكرى !!

حط الهدف أدامك .. و اعمل المستحيل عشان تقدر توصله .. !!

حِب ما تعمل .. حتى تعمل ما تحب !!

و استحمل التعب شوية .. و اعرف إن مفيش حاجة بتيجى بالساهل .. لأن اللى بييجى بالساهل .. بيروح برضه بالساهل !!

إجتهد واعمل إللى عليك .. و سيب الباقى عاللى خلقك ..

و اعمل إللى إنت شايفه صح و مقتنع بيه ..

ما تعملش حساب لغيرك .. لأن غيرك عمره ما حيشكر فيك !!

كون نفسك ،ما تحاولش تقلد حد .. خلّى دايما غيرك هو إللى يقلدك إصحى لنفسك و خلّى بالك من كل إللى حواليك ...

إوعى تدى سرك لحد .. لأن الدنيا ما عدش فيها أمان يا صاحبي !!

دوّر عالصديق المخلص .. و امسك فيه باديك و سنانك ..

لأن هو دة مرايتك إللى حتشوف فيها نفسك علي حقيقتها !!

و طالما ما بتغضبش ربك و ما بتزعلش منك حد .. يبقة عيش !!!

إضحك و فرفش و هيّص ... ملعون أبو النكد يا شيخ !!

إوعى تجرى ورا الدنيا .. سيبها هى إللى تدور عليك وتجرى وراك ..

و كل أما هتديها ضهرك .. كل أما هتجرى وراك أكتر !!

ونصيحة بجد بجد من قلبي .... إوعى تمشي ورا كلام الحريم ..

لأنهم م الآخر حيجيبوك ورا .. و تبقة حالتك متأخرة !!

ما تخليش دوامة الحياة تاخدك .. وتخليك عايش زى التور فى

الساقية .. و تنسي إنك بنى آدم .. من حقك إنك تحب و تتحب !!

أخرج من القفص إللى كنت حابس نفسك فيه ..

و اقلع النضارة السودا إللى كنت شايف بيها حياتك ..

و بص عالدنيا من أول وجديد .. هتلاقيها حلوة أوى ..

و تستاهل إنها تتعاش صح !!

و المرة دى خلاص .. لا يمكن حتقع تانى .. لأنك خلاص إتعلمت ..

و فهمت إن الضربة إللى ما بتكسركش .. بتقويك أكتر !!

ما تحاولش تعامل الناس بمعاملتهم ... خليك إنت دايما الأحسن ..

سامح و اغفر و اوعى تفكر تظلم حد .. لأن الأيام دول يا صاحبي ...

و إللى حتعمله النهاردة .. حيتعمل فيك بكرة !!

و يا بخت من بات مظلوم و لا باتش ظالم !!

ما تستعجلش على رزقك .. و إوعى تبص للى ف إيد غيرك !!

إرضي بنصيبك إللى قسمهولك ربنا و اعرف إن الخير هيجيلك أكيد .. إن ما كانش النهاردة هيبقة بكرة ..

إسرح بخيالك للمستقبل .. و إللى انت شايفه النهاردة خيال ..

بكرة هيبقة واقع !!

خلّى عندك ثقة فِ نفسك .. و إوعى تحس إنك قليل ..

لأن إنت حاجة كبيرة أوى .. و تقدر تعمل حاجات كتير ..

لأن إمكانياتك و قدراتك أعلي من الباقيين !!

وتأكد إنك حتنجح .. لأنك واد رجولة ..

و لأنك فعلا .. قدها وقدود !!!!