مين باعك يا بلدى ، بقلم / سيد منيرعطيه

معقوله دول ولادك؟

دول اللى باعوا ترابك

عروا ثيابك

نهشوا عظامك

مين باعك يا بلدى ؟

مين قبض تمن الخيانه

مين قسم حدودك

مين سهل خروجك

يا حسره وندامه

مين سمع كلام اوباما

مين سرق ونهب سولارنا وعشانا

ليه جنودنا بيموتوا فى الشوارع

ليه حياتنا رخيصه علينا

لما اسهر الليل انادى

حلم مخنوق بالايادى

وصوت أنين

رعشته هزت كلامى

لسه باسأل ضى النهار

ليه الحياة صعبه علينا

ليه كل الايادى مشتاقه لينا

ليه تربنا هدف لكل طامع

ليه مصر هانت علينا

حتى السؤال

نفسى أسأله

ليه يا بلادى حزنك كبير

جرحك اليم

ليه كل الاعادى

متربصه فينا

وحبل المشنقه حوالين إيديكِ

كل الحروف بتبكى ليه

خايفه يعود الظلم

خايفه تختفى الملامح

او يتمحى اسمك

لحظه غروب الشمس

الحكايه مش رئيس

الحكايه اكبر من هم

الحكايه

تتقسم بلادى

يتفرط عقد الفل

مين ما حسش حبك يا بلدى

مين ما حسش ضمتك

وقت الشدايد بنلاقيكِ

بركان حنان بيضم

لهفه الطفل الصغير

وحنان الام

اصل الحكايه اكبر من كلامى

حكايه ام

كبرت ولادها

نسيوا حنانها

جحدوا عليها

نسيوا كل شبر

فوق ارضها عاشوا كرام

يا مصر يا امى

إشتقتلك

بحن لك

صعبان عليه وقفتك

بين ولاد نسيوا حضن الام

نسيوا إن الوطن توب كبير

نتلف فيه وقت الشدايد والمحن

نفسى اصرخ يا بلادى

نفسى اقول حرام عليكوا

نفسى تبكى عيونى

وتبلل دموعى تراب الارض

نفسى اشرب من نيلك

وادعيلك بطول العمر

اصل الحكايه مش عنف زايد

لاء

الحكايه

مارد كبيرعايش معانا

بيخنق شعاع الامل

فاكر ان العنف حل

ممكن يعيد كرسى زايل

او حضارة سبع تلاف سنه

ممكن تضيع

او نيل ممكن يجف

او شعب ممكن يخاف م القهر

الحكايه اكبر من كلامى

بقلمى/ سيد منيرعطيه