سايبك يا بلدي و مهاجر ، بقلم / وائل عبد المنعم

سايبك يا بلدي و مهاجر

خلاص نويت الرحيل

ما الكل فيكي بيتاجر

وينخر ف جسمك النحيل

متقوليش عليا جبان

و سيبتك يا بلدي وطفشت

ماانتي اللي فيا عشتي

زي ما فيكي أنا عشت

لكن قوليلي احارب عشانك مين

ما دول ولادك ودول ولادك

والكل يا امنا مصريين

الكل شايَلك هم علي همك وزادك

وانتي يا صابرة خلص صبرك

والدمع فـ عيونك اتكلم

والكل بيحفر بايده قبرك

وأنتي بتصرخي يارب سلم سلم