‏الشاعربهاءالدين بدوي‏...../// \رسالة من عمو بهاء المسحرات ( 9 )

مسحراتي وشغلتي أسَحّر الصايمين ..

عاشق وبأهوى الجمال
والخير يابني آدمين ..

راح أبوح بسر عجيب
بس للحلوين ..

مين اللي قال
إن الجمال في العين

ولاّ في شامة حُسن
محفورة ع الخدين

ولاّ في رموش طوال
وغـُرّة ع الحاجبين ..

فيه ناس تقول السُمر
فيهم جمال أكتر ..

وناس تقول في الشُقر
عن الجمال دوّر ..

وناس في حيرة ياعيني
ولسة بتدور ..

أنا عشت عمري سنين
تايه مع التايهين ..

وشُفت فيه حلوين
من كل شكل ولون

وكل يوم يمضي
الثانية فيه بسنتين ..

ياللي إنت غاوي الجمال
تعالى واتعلم ..

سر الجمال في إيدين
بالحب بتسلم ..

سر الجمال إنسان
طيب ومتبسم ..

ومشاعره صادقة وذوق
فهمان ومتعلم ..

وإن جار عليه الزمان
صابر مايتألم ..

ولسانه عن كل عيبة
صايم مايتكلم ..

نور الجمال في القلب
ع الوجه بيعَلِم ..

ربك جميل وجماله
ع الخلق متقسِم

ياللي إنت غاوي الجمال
تعالى وإتعلم ..