๑۩۞۩๑ قبلة حياة ๑۩۞۩๑ فى شارع الحب الكبير .. قابلنى قلبه وِسط الزحام . كان له جناحين .. مشتاق يطير .. كَت سِكّته مِسك الخِتام . نَاديت عليه بشويش .. من بين كل الناس . نادانى هوَّ بشوق .. و بلهفة الإحساس . كانت عنيه متكحّلة بليله الحزين .... و تاريخ حياته بتوصفه .. و بترسمه خطوط عالجبين . و لقيت ملامحه فيها .. من عمرى اللى فات . فكرنى بالحب اللى مات .. وِسط السكات . مديتله ايدى .. و كأنى بلمس قوس قزح . شقّيت وريدى .. و قسمت قلبي من الفرح . تاهت خُطايا فِ سكّته ... و كإنى روح .. متعلّقة فِ حبل الخلاص . و رسملى بسمة بشِفّته .. و كإنها للحب كاس . شربت شهد من جوّة شهد .. و حلو شهده صحّى الحواس . حسيت بإنى لسة حبدأ سكتى .. و تهت فِ عنيه .. و انتفضت .. و دق قلبي .. و من حنانه انا دُبت فيه .. و لقيتنى بغرق جوة بحر .. مالوش قرار .. بستنى لحظة الاحتضار .. فجأة التقانى .. و شدّنى لبحور هواه .. كَت ضحكته قبلة حياة .. أو طوق نجاة .. و فرد جناحه وضمِّنى .. و طِرت فِ سماه .. حلفت إنى لا يوم عشقت . و لا الحياة اللى قبل منه .. و عشتها .. كانت حياة !!
ليست هناك تعليقات