أرفض تموت : بقلم /الهام شحاته

أرفض تموت

**********

اخرج من الدوامة -

وانطق -

قول ياقلبى وانطلق

ابنى الجسور

بين السطور

ارسم بحور

ارسم شطوط

وارسم " يوتوبيا " -

الحلم فى الزمن الجميل

واكتب بنبضك

سيمفونية -

واعزف اللحن المميز -

للهديل

خطّى على الأحزان وفوت

لو حتى بعد الخطوه موت

خطط ونقــّـط ع الحروف

والعب معاها -

لعبة البنت الجميله وحلمها

جوه الدواير والأمل

فكر وطير

واحكى الحكاية وابتدى

دافع وعافر

فى انحناءات المدى

واطلق من البرج الحمام

فالنبض ترياق العليل

احرق خيوط 

العنكبوت

وارفض تموت

لو علقوك 

فى المشنقة

اوعاك تموت

اكسر حدود

كل السكوت

وانطق وقول

واياك تتوه

جوّه الملامه والملل

غنى بشوقك -

غنوة الناس الغلابة -

وابتهج

وارسم على 

كل الوشوش

شوقك لتجميل الأمل

وانطق وقول

الكلمتين

الحب نبضك للحياه

لو حتى كانت 

بين وحوش

**********************

من ديوان

( جرح الهوى )

للشاعرة

الهام شحاتة