مسابقة رؤية قلم : المركز الثانى عاميه / سعد الشــوادفى
الشاعر / سعيد الشوادفى
الفائز بالمركز الثانى فى شعر العاميه
ولسه
بحبك يا مصر
كنت عيل وسط العيال
علمونا في المدارس
مهما نار الظلم تعلى
بيجي يوم والنور يبان
كنت بكبر وحبي لك
يا مصر يكبر
وفي يوم قالولي
انت مطلوب وسط الجيوش
قولت اهلا بالبطوله
وكنت حارس للحدود
خلصت جيشي
وقلبي كان ملان طموح
وفضلت قاعد ع القهاوي
زي زي شباب كتير
قولت اسافر اي دوله
يمكن اقدر يوم اكون
الايام تمر صعبه
ابتسم دايما واقول
بكره احلى من النهارده
وفي يوم لاقيت
شعب مصر قامت قيامة
اسقطت راس النظام
قلبي كان جوايا يرقص
قولت مصر هتبقى احسن
شهر مر وراه سنه
لا مصر قامت
ولا الشباب اتوظفت
وفي يوم
صاحب ليا جه سالني
انتم حقيقي عملتوا ثورة
من غير ما افكر
قولت طبعا
انت مش عايش معانا ولا ايه
رد .. قالي ............
ازاي تقولي عملتوا ثوره
وكل يوم شباب تموت
والهتاف العالي دايماً
مساواة .. حرية .. عدالة اجتماعية
وفجاة ..... راح مني الكلام
ولسه بحبك يا مصر
ليست هناك تعليقات