مسابقة رؤية قلم : المركز الأول عاميه / منتصــر سليمان

الشاعر / منتصر سليمان

الفائز بالمركز الأول فى شعر العاميــه

عرين الفار 

***

من عينًى نطت لقلب الدار . . 

تلم روايحى تلضمها .. 

هبابة ضى 

و صوت يشق الحيطة يخرمها 

حضرة و زار 

زمان منـدار !!

عباية البت مشغولة .. 

بشهوة ولاد الحى 

هبــــــــــــابة ضى .. 

نعجة نامت ف باط الديب ..!!

ف وسط بيتنا اللى كله دبيب 

و لمبة جاز .. و لا أنجاز .. و أزمة غاز 

و صوت مولانا ف الحضــرة 

سنيــة تدق الــهون 

شطة على كمون .. 

تهز الكون 

تخطى ع الغربال .. 

ترش الملح ف عيونا .. 

كنا عيال 

بنتوضى .. 

بصوت مولانا ف الحضرة 

و كانت ورا بيوتنا غطــــــــــــــان خضرة 

و كـــان الكون ..

على دا الحال .. 

حضرة و زار و دقة هون .. 

و كانت مريم .. بتقبل العدرا 

و انا بذكر ..

رب الخلق ف الحضرة 

" الله حى .. الله حى " 

يا بلدنا يا أخر الدنيا .. 

يا سمرة و ساكنة جـــــــــــــــوف الجوف 

مين هانك .. ؟ و مين خــــانك ؟ 

و مين دلاكى من حـــــــــدود الشوف ؟ 

و من طيبة .. 

سموكى و سمونى .. بثورة خوف 

و مين سرقك من غنا القنديل ..؟ 

و مين شربك .. ؟

فضى حــــــــوض النيل 

و نسوكى و نسيتى .. 

دقة الطمبور !!

هبـــــابة نور 

ف صحن بيوتنا بضوى .. 

يا عدرا يا ام النور 

غطوكى بالكراكيب .. !!

نعجة نامت ف باط الديب !!

أَه يا جوايا دا جوايا جــراح ما طيب 

هو انا ولدة اسد .. ؟ 

ولا انا وريث الديب ؟

و ليه عشان ناَكل .. ؟ 

نستحمل الضرب بالمراكيب 

***

يا بلد نامت .. ف بـــاط الديب 

و عامل انه صديق و أنه حبيب 

و أنه م السما نازل .. 

علينا رقيب 

و نهضة جاى بيها 

افعـــــاله على اقواه .. كلها بتخيب 

لا نخوة و لا رجولة .. 

عيـــــــــــــــــال أمنا الغولة .. 

دقــــــون مفتولة 

عيون عمية .. قلـــــــــــوب حولة 

و صوت مولانا ف الحضرة .. 

لا هاشش و لا ناشش !!

بيحكى معركة قادش .. 

بيتباهى 

بأيام راحت و ناس عدت 

سنية تدق الهون .. 

تهز الكون 

و احنا ف الحضرة 

بنتمايل ندق الطار .. 

يختلط صوت الذكر ويا صوت الزار 

زمان مندار 

نام الأسد ف الجحر .. 

و حكم ف العرين الفار