طب أنت فين ... بقلم الشاعر / أحمد الخليفة

بقلم / أحمد الخليفة

 

حبة ورق
ودم سايل
وريحة ابني ع الرصيف
مفضلش منه غير قماشة
وشنطة تايهة
...

مين توهك فوق القضيب
القطر يا بني؟!
ولا خيانة دقن خايبة ومفتريه
ولا اللي نايم من وجع
ولا اللي سايق وعيونه تايهه
ولا يمكن انك رضيت تكون حبيبي
مين بعترك فوق الرصيف؟
طب قولي فينك
وانده علي
سامعك يا غالي... طب قولي فين
صوتك جرس
والمزلقان ملوش جرس
والدمعة خايبة
الدمعة خاينة
بتخاصم الوش اللي خايف يحضنك
طب قولي فين
هو انت لسه بتخاف ازعق عليك يا غالي
مش باقي مني غير خشب
جسمي خشب
قلبي خشب
روحي في بعدك لوح خشب
لاحلف بدمك يا ولد
اخد بتارك
لو كل سوسهم في الخشب
طب انت فين؟