آسف يا حزن ... بقلم الشاعر / بهاء بدوي

بقلم / بهاء بدوي

 

آسف ياحزن .
أنا جاي لك
...

سيبتك يومين
إشتقت لك

وقبل ماأمشي
أنا قلت لك
خليك بعيد
وبكف ايدي
شاورت لك
وهمست لك
وشرحت لك
عندي حبيب
ملهوف عليه

لمحت ليك
بصيت عليك
وضحكت لك
بس انت برضه
ندهت لي ..
لبيت نـداك
وندهت لك
وقلت إرجع
خليك معايا
ورجعت تاني
رجعت لك ..

نعم ياحزن..
إشتقت لي ؟
أنا كمان ..
إشتقت لك
عارف ياصاحبي ؟
انت حبيبي ..
وقدري أنت
بالعشرة دول
بصمت لك
إن أنت أوفي
خـل ليّا ..
عمرك في يوم
ماسبتني ..
حنيت عليّ
وأنا كمان ..
حنيت لك ..

تعالى إدخل
وجوة قلبي
راح تلتقي
فيه باب كبير
خبط عليه
وهتلاقيني
فتحت لك ..
وفي حضني هاأخدك
وأقول تعالى
إشتقت لك

حتلاقي جوة
بيت كبير ..
بنيته لك
وكمان حتلقى
صبار كتير
وشوك بيألم
زرعته لك
وزهور بتدبل
علشان تونس وحدتك
وكله منك
وكله لك ..

أبوس أيديك
ماتفوتني تاني
تبت خلاص ..
سلمت لك
أصل انت أرحم
من ناس كتير
في يوم خدوني
ورجعوني تاني لك
قالوا لي ارجع دنيتك
ورجعت تاني ..
اشتقت لك
ورجعت لك ..

آسف ياحزن
أنا جاي لك ..