يادنيا ليه الخداع؟؟ .. شعر غنوة عبد الرحمن

يادنيا ليه الخداع؟؟

 

شعر : غنوة عبد الرحمن

 

 

 

 

يادنيا ليه الخداع؟؟

ملّيت أنا منك-

طول عمرى انا متباع-

وانت ولا هامك-

احصد ف ليلى شوك-

واسهر ليالى الشوق-

وازرع قلق وشك-

عطيانى ليه ضهرك؟؟

يادنيا انا ملّيت-

حتى البحور عديت-

وطلعت جبل الصبر-

وشربت كاسات مرّ

وانت ولا هامك-

مين اللى باع دمك؟؟

خلاكى ماتحسى؟؟

يادنيا ليه الحبيب؟؟

يقلب على وشه؟؟

ونا كنت بستانه-

وكنت انا ورده-

وكنت ليه الغطا-

وكنت انا فرشه-

ليه يحرق البستان؟؟

ويشمت الغربان؟؟

ويطير العصافير؟؟

ويتمادى فى غشه؟؟

العيب فى قلبى انا؟؟

ولا ف سواد رمشه؟؟

يادنيا ليه العذاب؟؟

نفسى ف يوم ارتاح-

نفسى اشوف الفجر-

طارح من الضلمة-

ليه يسرقوا الانوار-

ليه يبعدوا الاحباب؟؟

مش اسمهم ظلمة؟؟

الصحبة ليه ساعات؟؟

او بالكتير أيام-

كأنه ماشافنى-

ولا سمع عنى-

وينسى حنان حبى-

خلاص يادنيا سلام-

بينى وبينك خصام-

ولا عمرى حنده لك-

ولا عايزة اشوف وشك-