(( رداء المسكنة )) للشاعر ~~~~~ رضا ابو الغيط
رداء المسكنه
******************
الحرف رافض
يترسم فوق السطور
والكراسات متنطوره
فوق عقل بور
والحبر فى جوف القلم
صابه الألم
لما المعانى اتبدلت
صبحت كسور
والكلمه سكنت ف القبور
الكبرياء
لابس رداء المسكنه
راكب صاروخ
بيطوف جميع الأمكنه
ومخبى سهمه وخنجره
ف جراب شغوف
للانتقام
من الكلام اللى انكتب
جوه الضمير اللى انصلب
لحظة غياب شمس النهار
لحظة فرار لحظة كسوف
والساقيه تايهه ع السراب
غطاها م الجهل التراب
ومن الجفاف ف سنين عجاف
مش لاقيه ساقيه بألف ناف
مش لاقيه ثور
تعصب عينيه وتلففه
علشان م تروى بالأمل
حبة جذور
تطرح غناوى للزمن
تطرح زهور
تبقالى فرحى ف المحن
تبقالى نور
والدود بيسرح ف الغيطان
ياكل وينهش ف الورق
فوق العيدان
لحظة غياب
طيرى اللي كان مالي الميدان
لحظة م سال دم السحاب
فوق التراب
يوم م الغراب باعنا وخان
والحزن فارد سطوته
فوق الجسور
والسوس بيُنخُر ف الزمن
وبيدفنه جوا الجحور
يا ألف آه ع اللى مناه
يلقى كلامه مستخبى ع الورق
بين السطور
يا ألف آه ع اللى مناه
منه انسرق
يوم ما انحرق وسط القبور
علشان حلم
يطرح كلامه للبشر
فرح وزهور.....!!!!!
ليست هناك تعليقات