(( عتاب حب )) للشاعر ~~~~~ محمود وحيد
عتاب حب....كلمات محمود وحيد
===================
وجانى يقولى فى منامى
يا واد مالك
ومال الدمع ف عيونك
سلاسل ليل
وليه اليد فوق الخد
كأنها حتة من وجهك
وعن خدك ما راضية تميل؟
أهاتك ليا وصلانى
فى صوت وسكوت
يا ولدى قولى إيه صابك؟
وليه نفسك يا ولدى تموت!!!
خلاص الدنيا ضاقت بيك!
وطبع الخلق مش عاجبك؟
يا واد إكبر بلاش تفاهات
وزيح الهم من قلبك
ميزان الخلق طول عمره
يا واد مقلوب
تبات غالب فى نظر الناس
لكن جواك تبات مغلوب
فسيبك من طباع الناس
وصًفى النية لاجل تعيش
يا واد ان توهت راح تنداس
وتحفى ما تلاقيش العيش
قالولنا زمان
وكان القول زمان موزون
لسان العبد جنة ونار
وبيه يكرم وبيه بيهون
فوضى الحرف قبل القول
ولو قلقان بلاها تقول
وزى ما ليك ف راسك عين
فكل الخلق ليها عيون
يا ولدى الوحدة دباحة
وتوب الهم توب فضفاض
وابن الدمع ليله طويل
ومتكحل نهاره سواد
فقوم إغسل دموع همك
وسلسل دقة الأوجاع
وصفى الفكر م التوهه
وافرد للى جاى الباع
وخد بالك
مفيش غيرك يصون ولدك
فعيش يا ولدى لعيالك
وربيهم على الإخلاص
وحوٍش م العمر كام يوم
يشدوا ضهرك المحنى
ساعة ما الشيبة تملى الراس
واوعى تمد ايديك للخلق
ولو روحك يا واد ف الحلق
ما تطمع ف اللى فى ايد
غيرك
ولا تطلب بباطل حق
تجوع البطن مهما تجوع
فمقدور الصبر ع الجوع
لكن النفس لو جاعت
هتاخدك يا ولد لبعيد
وتغرق فى بحور الهم
وفيها يا ولدى تتبعتر
ولا يمكن يا واد تتلم
فقوم انفض غبار الموت
وعيش العمر كيف ما يكون
وسيب الخلق للخالق
د ربك له فى خلقه شئون
موازين العباد بإيديه
وعين الحكمة سلطانه
بيفرد كفه للمحتاج
وقبل عذابه غفرانه
فسيب القلب ف الملكوت
يهيم جواه
ويقرا اللى ما هوش مقرى
وعين الخلق
مش شايفاه
ولا عارفاه
ولا فاهماه
يا واد افتح بيبان الروح
وخلى الضى يحضنها
ويتبعتر فى أركانها
يشد الصبح م الضلمة
ويهدم فى الأمل خوفه
ويبنى حياه
ليست هناك تعليقات