ساره *-* بقلم الشاعر / إسلام ياسين
"ساره"
قلبى اعلن الف غاره
جوا مية مليون عباره
والى تابع شاف حروفى
كام قصيده ف حب ساره
كل مابتبعد زياده
كل مايزيد الاشتياق
والوساطه الداخله بينا
مش بتفرق ف الفراق
القلم اعلن حصاره
ورغم حجم خيالى داق
كل ما اكتب عن بلادى
والمعالم .. الله عالم والحضاره
القصيده تاخدنى تانى
لحضن ساره
تبتدى تفرض شروطها
انحنى وابدأ اشاره
ايوه ضافت معنى تانى للحروب
الانسحاب مهوش هروب
والهروب محتاج مهاره
ع الورق انا كنت اشطر واد يحب
وكنت اصدق ورده دبلت
حتى لو دبلت بكذب
كنت جوا بحور عنيها
تغطس الاشواق تقب
كنت اخاف جدا عليها
لما تكره او تحب
لسه فاكر كل لمسه
كل همسه
رأيها ف شعرى وكلامى
شكلها الساكن ملامحى
واختيارها لحالتى ديما لما
بتوه الاسامى
رغم بعدى
وعمر عدى لسه ساكنه
سنين غرامى
لسه كل كلامى عايم
كل ما اجى اقول بلادى
والحضاره والمناره
والطيابه ف كل حاره
بلقى ساره
ليست هناك تعليقات