ترنيمة العشق والغربة ، بقلم / الهام شحاتة سالم

أنا الغرقان

فى بحر هواك

أناديلك

واقيد بالحب قنديلك

أنا طيرك

وطاير فى السما بشوقك

يغنى عذب ألحانك

حكاوى الليل

وهم الويل

فى تكوينى

وحبك نبض أنفاسى

يا تاج راسى

انا فجرك

انا شمسك

وكل شعاع

على فراشى

بتاخدينى لأحلامك

أنام واحلم

واعيد الحلم من تانى

أشوفك سمرة وبهيه

واشوفك طرحه منقوشه

وجلبية

ومنديل أويه وعصايا

ونيل أبيض

بطعم الشهد

ياامايا

وقلبى فى الهوا عاشق

بيكتب قصتى ف حبك

ويوصف فى العيون السود

ومهما تغضبى منى

غرامك راح

يدفينى

انا عاشقك

ودمى يكون فدا دمك

ولو حتى شنقتينى

وكوانى البعد -

فى فراقك

وصدك تاه

فى تكوينى

بالاقيكى

فى عز الهجر بتنادى

وتاخدينى كده ف حضنك

م انا عايش

فى تكوينك

بنيت لك عش فى قلبى -

وصورتك كما العصفور

يغنى ف قلبى ألحانك

وانا واقف

على بابك

- على اعتابك -

ومستنى تضمينى

تضمى العشق والغربة

وادوب فيكى

وحشتينى

وبتمنى تشوف عينى

قمر طالل من الشباك

وحضنك وحده يكفينى

وحشتينى

-----------------------

من ديوان ( انا عاشقة )