يسقط حكم العسكر ، بقلم / سيد نصر

من إمتى لينا فيك

حق ياوطن

من شمالك لجنوبك

من أغادير لعدن

تدخل قسم شرطه تنهان

تقف في طابور جمعية

تنهان

تجيب رغيف عيش

تنهان

تدخل مستشفى

تنهان

روح هات سرنجه

مالسرنجات كتير قدامك

هاارميها في الزباله

ولا أديهالك

مافيش سرير فاضي؟

مالسراير كتير

دي محجوزه لاسيادك

كل واحد بيتفصللوا إهانه

كأنهم بيفصللوا له

بيجامه

المشكله مش بس في

الاهانة

المشكله في اللي بيحللوا

الاهانه

عاملين زي العاهره

اللي بتعاير الشريفه

على شرفها

أقزام في كل مكان

وأكثرهم في الاعلام

ليه بننهان ؟

هو احنا مش عملنا ثوره

ثورة مين ؟

احنا متهيأ لنا

دي كانت ثوره

فشنك انضحك فيها علينا

ثوره من نوع

صنع في الصين

كلنا حتى مبارك

كنا ممثلين

والثوار كانوامستعجلين

فرشوا على الارض أحلامهم

وقعدوا متربعين

وقال ايه ياجماعة

خلاص المجلس العسكري

وقف

في صف الشعب المسكين

يانهار مطين بستين

طين

مااحنا بقالنا ستين سنه

تحت حكمهم في الطين

والكل كان مغفل

واكبر المغفلين فينا

كان الاخوان المسلمين

نفس الاخطاء بتكرر

اربعه وخمسين

ومع السادات

في واحد وسبعين

نسيوا بسرعه وسلموا ايديهم

بحسن نيه للتعابين

وما شافوش الطعم

اللي في السناره

وأرجع واقول

حقك على يانواره

كنت في حقك غلطان

كنت دايما بتقولى

العسكر مالهمش أمان

يسقط

يسقط

حكم العسكر