{ عش الغلابة } ..... طارق العجمى :::::::::::::::::::::::::::::::::::::: ماسكانا من تحت الوجع بتهددينا بالودع بنخترعلك فى الأمان يمكن تاريخك يتصنع الدم سايل ع الرصيف مستنى فرجة ربنا والهم ربع فى الضلوع والأرض لية متحملة ندهس ترابها بحملنا والصوت برغم إنه إتنبح بينادى ع اللى بيندبح "" "" "" أصل الحكاية فى عش فية الخير طرح سانداة سدابة من الخشب وفوقيها حبة قش رز مضللين ع البنت شادية الطيبة بنت الفقير يادوب تحوش الشمس عن راسها وهى جامعة قمحها وبتطحنوا علشان هاتصحى بدرى تحمى وتعجنوا وراحت تنام ع الأرض جمب اللى إتولد عماله تحلم ببكرة ييجى على البلد من غير دجر .. ويسافر الحلم الحزين فى جوف بشر عمال يدور ع السكون بس المطر بيغرق الطين والعجين ويبوظ الخبزه اللى كات بنت الفقير م الفجر قاعده ترصها والكلب نايم أصله كان حارص عريش الفلاحين وف لحظة واحده بيتقتل ويموت فى وقت المجرمين ما يحاولوا بيها يختلوا ولا صاح ولا ناح ولا حتى هبهب فى الصباح ولا صحى سيدنا الشيخ فؤاد يصلى فجره فى الميعاد راحت علية ركعتوا وباظ العجين والكلب مات والعشة المعروشة بحطب لولا المطر لكان زمانها بتتحرق فى وقت مالخبز اتسرق اما الصبية قامت تولول ع الرغيف اولادها نايمين ع الحصير كل إعتمادهم ع الرغيف واللى بيخرج م الحظير كل المواشى اتحررت جريت فى ارض المعتوهين فك الحرامى حبلها لأجل ما ي تاجر فى قوت المحرومين بس الغفير كان راح فى نعساية وسرح ووقت م الكلب انضرب . بالنار جرى .. مفزوع يدور ع المداس قايم متلوه م النعاس زى اللى كان شارب عنب مسطول بكاس راح يجرى حافى بسرعتوا على عش سيدنا الشيخ فؤاد كان الحرامى خلاص هرب وكل اللى يقدر يعملوا بيقول قانون دستور محايد فى البلد هانشكى للعمدة الحدث يمكن يلاقى المتهم ومين فهم..؟؟؟؟؟؟؟؟ أصل الحكاية ف دستور غفير وعمدتوا والشيخ فؤاد وكلبوا وبنتوا وعشتوا ولص مخفى فى البلاد يظهر فى أوقات غفوتوا ماينامشى غير لو شاف حريقة فى بلدتوا واللى يكيد برغم كترة الغفر وبرغم حرقة البشر ما حد طفى ولعتوا . ........................................... tarek
ليست هناك تعليقات