أخلاق للبيع ... بقلم / حلمي قاسم

بقلم / حلمي قاسم

 

أخلاق للبيع"
******
قرب قرب ...فتحنا المزاد
قرب واتفرج قبل المبعاد
بضاعه اصيله بتاعة زمان
... يا مين يشترى؟..يالله يا جدعان
معانا الاخلاق معانا القيم
معانا الشهامه معانا الكرم
معانا الفضيله معانا الحياء
معانا الجدعنه معانا الوفاء
معانا الضماير بأرخص تمن
معانا المحبه معانا الأمان
قرب تعالى قرب كمان
بضاعه ببلاش وكله بالمجان
الشعب المصرى باع وغيرالطباع
وبدل الصوره وغير العنوان
مين يشترى ؟..مين يا جدعان ؟
****
ومصر الجميله امهم واقفه
وفي عنيها الدموع الوان
مش حاسه بوجودها ..دبلانه على عودها
شابت و عجزت قبل الأوان
مين اللي عايز يشترى ؟
ومين اللي كان زعلان ؟!
الشعب بيبيع خلاص
وبحاله مــــــــــــــش دريان
بيبيع المرؤه و القيم
وفضل التــــــــــــــــــوهان
يا خساره يا شعب مصر
يا خساره يا انســـــــــــــان