خايف عليكي ... بقلم أ / حلمي قاسم

بقلم / حلمي قاسم

 

خايف عليكــــى
*******

لما اشوف عودك بيدبل
والدموع
عشقت عنيكى
واما الاقى
الحلم ضايع
والامان بقى
صعب فيكى
واما الاقى الفرح غاب
مفضلش غير
الجرح ليكى
بخاف واموت
م الخوف عليكى
....
واخاف عليكى
من الالم ومن الدموع
من اى اهه عايشه
ما بين الضلوع
من ضحكه حايره تايهه
مش لاقيه الرجوع
.....
واخاف عليكى
لما تبقى حد تانى
ماعرفوش
واما الاقى الحب ميت
فوق نعوش
.......
واسرح بعقلى
وافتكر حلمك زمان
حلم الكرامه
والرغيف ويا الامان
يوم ما كان الحق
لسه ضعيف وحاير
يوم ما كان الظلم
مستقوى و جاير
بعــــــــدها هبت
رياح الخير بشاير
يــــــــوم ميلادك
يوم ربيع ثورة يناير
وانتصرتى
لما ثورتــــــــــى
و بعدها ليه
انكسرتى؟!
واتحصرتـــــــى
واتقهرتى
وخلتينى عليكى اخاف
*********