ياواخدة القرد .. بقلم : بهاءالدين بدوي
ياواخدة القرد على ماله
يغور القرد مع ماله
وطمعنجي بنى عمارة
فلاسنجي سكنها له
تسيبي الناس ويغرك
بوز النسناس وطول ديله
بكتر فلوسه هيذلك
وهيخليكي كارهة الدنيا وخياله
يابنت الناس تعالى أقولك
وأنا خبرة بحال الدهر وأحواله
دا شاب فقير وبيحبك وبتحبيه
معاه الدنيا تحلى لك وتحلى له
وتبقي دنيته وماله
ونجمة ليله وهلاله
وإيد على إيد خيركو يزيد
ورزق المولى هيجيلك وهيجيله
تعيشوا في تبات ونبـات
وتبقي أم لعيالـه ..
ولحن غناه وموالـــــه
وفرحه وبسمته وسعده وآماله
هاأقول من تاني وهاأعيدها
وإسمعي مني .. وأنا خالـو
ياواخدة القرد على ماله
يروح المال ويبقى القرد على حاله
ــــــــــــــــــــــــــــــــــــــــــــ
ليست هناك تعليقات