سوق الألقاب ..... بقلم الشاعر / علي فرج

 

 

بقلم / علي فرج

 

شاعر كبير،، شاعر تقيل
شاعرعظيم ،، شاعر أصيل !!
مكتوبة قدام الاسامي ..
بدون سند وبدون دليل ..
طب ياعم استنى حبه،
لما تعرف لو لمرة يعني ايه تشبيه جميل !
طب بس إدينا أمارة ،
والا خلاص اللي اختشوا بقيوا قليل !!
........................
مهما يلخبط في الحروف ..
لو حتى قال ع الفيل خروف !
لو كافه قاف ! او سينه صاد !
أو حتى نص حروفه ضايعة ،
يقولوله يااااه ده كلام جميل !!!
والإعجاباااات ، ومشاركاااات ، ومجاملاااات ،
وحاجات كتيييير ،
واللهِ خايف ع اللّغة ،
من الكبير ومن التقيل ومن العظيم ومن الاصيل !!!
يارب خلّيني كده ، أسمي مجرّد ،
مش هاحط قبل اسمي اي حاجة ،
خلّي اللي يقرّالي يقول :
إن كنت شاعر ،أو كبير ، أو عظيم ، أو تقيل !
لمّا تيجي منكم انتوا بيبقى ليها طعم تاني ومعنى تاني ،
معنى عظيم معنى كبير معنى أصيل معنى تقيل !!!