أحدث المواضيع

شجرة حب ... بـقلم / الشاعرة سامية سليمان

شجرة حب
--------------
ياشجرة حب وفروعها
أمل وأمان
وضلك بالغصون فارد
ف كل زمان
ونورك ع الجبين شاهد
علي الوجدان
باحبك ياللي سامعاني
وحاساني وفاهماني
ياشايلة عني أحزاني
وابات فرحان
ماهو انتي أصلي وجدوري
وانتي في الضلام نوري
وانتي راحتي وسروري
وروحي كمان
باحبك حب مش عادي
باحسه ف حضن أولادي
بيروي روحي وفؤادي
وانا عطشان
يانهر حنين وبيكفي
ياقلب كبير وبيوفي
ياحضن حرير وبيدفي
شتا البردان
تودي كتير وبنقصّر
وتدي كتير وبنقدّر
وحبك كل يوم يكبر
يابحر حنان
يامرسَي لقلبي لو يتعب
ياشايلة همي لو يصعب
ياغالية .. لو تسامحيني
أنا الكسبان
وإيه أقدر أنا ادّيكي
وعمري وروحي باهديكي
ح انول لو كنت أرضيكي
رضا الرحمن
أم الشعراء
سامية سليمان

أختر نظام التعليقات الذي تحبه