معلش ... بـقلم / الشاعر عوني هشام
========= عونى هشام
كله بيغلط وبيستعبط
تيجى تعاتبه يقول معلش
فاكر نفسه ابن بارم ديله
وديله كمان مصنوع بالغش
كله واخدها بصنعه لطافه
وحتى لطافه
سابت الدود يرعى ف المش
ليه تتحامل خليك راجل
خلى كلامك دغرى وخش
قول الكلمه وخلينا نفهم
انت واخدها رغى ودش
جاى تشخبط وبتستعبط
نغزة ابره يادوب وتفش
فاكر نفسه امير الشعرا
حافظ كلمه وجاى تقش
لا يا حبيبى طريقك وعرا
وجاى مجرور على كام عود قش
تيجى بادبك هنصون ادبك
وقلوبنا هتبقى لك عش
الوش التانى هتبقى الجانى
وتوبك هيكون خيش او برش
خلى كلامك جوه لسانك
يا تقول بيه حق ومتخفش
تيجى متهور راح تتعور
وان سألوك قول ده كان خدش
اصل القرع يمد لبره
ان مد لجوه لا ميطرحش
هارمى عليك بودرة عفريت
تسهر ليلك نازل هرش
من افعالك شوف ايه مالك
تيجى تنام ساعه ما تعرفش
حب الناس الناس هاتحبك
واحفظ ادبك ومتجرحش
ساعتها مفيش فيه بينا وسايط
ولا هتقول من تانى معلش
=========
#عونى_هشام
ليست هناك تعليقات