مجلة رؤية قلم / أغنية...يوه بقي اده / بقلم / الشاعر/ السكندري /علي الطاووس / تحياتي وفاء غريب.....
أغنية...يوه بقي اده
يوه بقي اده د د ده...
بقي أنا ح أحب ده...
أبو عيون حلوين...
و ساحر بيهم ملاين...
و علي طول زاغين...
علي اللي رايحين و الجايين...
و أبات أنا بقي منه...
علي نار و لهيب...
يوه بقي اده د د ده...
بقي أنا ح أحب ده...
يعني يا قلبي انت عايزني أحبه...
و اسهرله لحد ما أنام...
مفتحه عيوني أفكر فيه...
و أول ما يهل عليا...
فجر يوم جديد...
أقوم أجري عليه جرى...
و أحس أني ونا ريحاله با أطير...
علشان بس أشوف عنيه...
دنا عايزاه ليا لوحدى...
يسهر هنا جانبي...
بدل ما تخطفه واحده تانيه مني...
و ده عمره ما ح يكون...
ده هو اللي لازم يجيني...
و هو اللي ليا يقول...
بلى ريقى بقي بشوية عسل...
من شفايفك دول...
حرام عليكى دنا محروم...
يوه بقي اده د د ده...
بقي أنا ح أحب ده...
ونا اللي ح أتقل عليه...
و أقوله روح يا بني روح...
دحنا برضه حلوين...
و يجيني يمشي كده جانبي...
و أغيظ بيه الحاسدين ليا و لايمين...
اللي بيتلمو حواليا و هما ليا كايدين...
و أكيد بيه برضه ناس تانين...
كانو قبل مني في الحب واقعين...
يوه بقى اده د د ده...
بقي أنا ح أحب ده...
و يقعد هنا جانبي...
و يقولي كلام حب و يخلى...
و وجداني بكلامه...
من غير جناحات يطير...
علي شط أحلامي...
ونا وخداه بين أحضانى...
و كل صحباتي...
من غيظهم مني يروحو ميتين...
و أروح أشتري خرزه زرقه ليه...
و في رقبته حبيبي أحطها منهم تحميه...
و إذا رجع هو...
يبص علي الحلوين...
و اللهي عليه مش ح أغير...
بس أنا ح أقلعله عنيه ألأتنين...
و أقعد انا اللي با أسحب فيه...
يوه بقي أده د د ده...
بقي أنا ح أحب ده...
و ح أخليه يسهرلى كده تحت شباكى...
يغنيلى في موالي...
أعاني حلوه عجبانى...
توصف شوقه و غرامى...
و حنيني و يا هيامى...
و لما عنه أغيب...
يمشي في الشوارع ذي المجانين...
و لما يجيني مزاجى...
أبقي أبص أنا عليه...
و كمان من ورا الشبابيك...
يوه بقي اده د د ده...
بقي أنا ح أحب ده...
و أقوله و أناجيه و أناديه...
أنت مين ما تقولي أنت مين...
ياللي عنيك حلوين...
و اهمس با بحة حب و أقوله...
أنت عايزه أيه قلبي و لا حبي...
و لا عايزهم هما ألأتنين...
طب خش البيت من بابه...
و نادي علي صحابه...
و أطلب الحلال...
ده و النبي أهلي ناس طيبين...
و أبويا ح يطلب بس منك دبلتين...
يتحطو في صوابعنا اليمين...
و أنا ح أقف وراك فى مشوارك الطويل...
علشان بيتنا بقي نبنيه...
و نخلفلنا كده شوية عيال مأريض...
و نحتار نسميهم أيه...
أسم جديد و لا قديم...
يوه بقي أده د د ده...
بقي أنا ح أحب ده....
يوه و يا دي النيله...
دنا يظهر اني حبيته...
يادي المصيبه...
أبو عيون حلوين...
و ساحر هو بيهم ملايين...
و علي طول هما زايغين...
علي اللي رايحين و الجايين...
يوه بقي اده د د ده...
أعترف بقي خلاص أني حبيته ده...
مع تحيات شاعر الوجدان الشاعر السكندري /علي الطاووس 
ليست هناك تعليقات