كل حاجة عندنا متزورة = محمود محمدي العجواني -- تحياتي جدو عبدو
كل حاجة عندنا متزورة
علشان كدا كلنا جايبين ورا
والي بزور عاملي فيها عنترة
فارد جناحه والناس بترجع له ورا
ويوسعوله ويقوموله وكلنا بنكبرة
والصح بقا هوا الغلط ومعتش حد مقدره
والغلط هوا اللي ماشي كإنه ماركة مسجلة
والحرام خلوه حلال والحلال يرجع ورا
والفضيلة بقت رزيلة والرزيلة مسيطرة
تقوله يا ابني انت ابن مين
يقول أنا ابن الشيخ فلان
وانتي يابنتي بنت مين
تقولي بنت البيه فلان
طاب ما اجدودكو ما كانوش كدا
طول عمرهم ناس طيبة
إيه اللي خلاكوا كدا
قالوا ما اجدودنا هما اللي جايبينا ورا
قلت اخرس يا واد منك لها
أنت قريت سيرة الرسول ولا أبو بكر وعمر
ولا عمر عبدالعزيز ولا علي وابن الوليد
ولا صلاح الدين أيوب ولا هارون بن الرشيد
كلمة وهقولها ليكو لله
وكلام كبير وله معناه
جدودنا قالوها كلمة زمان
من فات قديمه يا ابني تاه
حتى الدوا والأكل بقى مغشوش
ومعتش حاجة مأصلة
ومن زهقنا شربنا سم
دا عيشتنا عيشة ممررة
وعشان نصيبنا ال ملازمنا
طلعت سمومنا مزورة
ومن كتر تزويرهم كمان
قالوا اللي بنى مصر كان في الأصل حلواني
ولي بنى مصر كان في الأصل عجواني
خواطر أخيكم
محمود محمدي العجواني
ليست هناك تعليقات