مجلة رؤية قلم / تحت خط الفقر / بقلم / محمد بدر.....
تحت خط الفقر ساكن
تحت خط الفقر ساكن بعيد عن دنيا المساكن
ف المدينة الحزينة اللى لون سكانها داكن
مش ح أقول عنوان سكنا ف قلب بيتنا إحنا اندفنا
ح نقول إيه الحظ خانه عايز أقول كتير ولكن
تحت خط الفقر ساكن
ف المدينة كتير بيوت فيها الحياة وف قلبى موت
والليل سكوت والعنكبوت و ناس بتصرخ بأعلى صوت
وكل يوم ساكن جديد جاى يفتح باب حديد
وكل يوم شايلين تابوت والموت بيملى كل الأماكن
تحت خط الفقر ساكن
وف أى وقت ناس تزورنا نقول بيوتنا تقول قبورنا
ودى الحقيقة وده قدرنا وغصب عنا يا ناس صبرنا
وليه الحقيقة يادنيا مرة ولا تنصفينا يا دينا مرة
وتطلعينا ف يوم لبرة الهم زاد وف قلبى راكن
تحت خط الفقر ساكن
محمد بدر
ليست هناك تعليقات