أنا الفلاح = خواطر أخيكم محمود محمدي العجواني -- تحياتي جدو عبدو
أنا الفلاح وطول عمري ونا شايل مقلتش اه
وباكل لقمتي بعرقي ومفيش يوم أكلت حرام
وابني مهما بتفوق مفيش حد بيقف وياه
ويقولوا عبد طول عمره ومفيش عندنا مساواة
منا كمان طول عمري ضايع حقي
وفاضل بس امد ايدي واقول لله
أنا فلاح وبفتخر إن اننا فلاح
إيدي خشنة من كتر العزيق بالفاس
ورجلي متشققة من جري ورا المحرات
أنا الفلاح باكل عود خس على جرجير
ولقمة عيش وباشرب ميه م التركيب
وربك محلي الأكل ف لساني وصحة حديد
أنا الشقيان أنا المطحون ومش قادر ف يوم ارتاح
ومفيش مستشفى تعالجني عشان أخف م الأوجاع
ولا فاضي أروح مصيف وشايل مقطفي والفاس
ومحدش سامع لآناتي ولا سامع ل آهاتي
وفيروس سي مع السي سي خلوني أعيش شحات
أنا بنذركوا لو هافضل كدا علطول منش شغال
وياله يا باشا وريني هتعمل إيه
وشيل الطين بدل مني عشان تبقى تقدرني
ول عامل عليه بيه يوريني هيعمل إيه
قولي يا باشا انت ابن مين
وانت يا بيه جدودك مين
انتو أبوكو كان فلاح
وتعبوا كتير عشان نرتاح
واحنا أصلنا من طين
ومفيش فضل لطين على طين
غير بالتقوى ويا الدين
هوا عشان أنا صابر يضيع حقي وأعيش متهان
واعيش خدام أنا ولدي ونشوفوا العذاب ألوان
وحق الله منا شغال ومش زارع ولا فدان
يا إما ازرع على قدي
وهاكل ولغيري مش هدي
ووروني بدون زرعي تعيشوا إزاي
دنا إنسان ولحم ودم مش حيوان
بس انا أصلي بيغلبني
ومهما حلفت من زعلي
مبقدرشي أنا أشبع وفيكو جعان
ولو حكمت ف عز البرد
أغطيكوا وانام عريان
دنا إنسان ولحم ودم مش حيوان
خواطر أخيكم
محمود محمدي العجواني
ليست هناك تعليقات