" الوداع " من سكات........#أحمد_رجب_النمر
" الوداع "
من سكات
العمر عدى خلاص وفات
و انتهى عصر الأماني
و ابتدا صوت النايات
يعزفلنا اللحن الحزين
ف بحور شجن معجون حنين
و يقول خلاص
دا مفيش خلاص
ما بقاش فيه حضن يضمنا
أو حتى حلم يلمنا
و اللي مضى بقى ذكريات
بتقولنا الحب مات
أيوة مات
لما غابت ضحكته
لما جت لحظة سكوته
يوم ستارة الدنيا نزلت
و اختفى من كونها صوته
راح و ساب فيا صداه
صرخته ف القلب تدْوِي
طالعة مني بألف آه
آه تنادى ع اللي غايب
سابني وسط الموج باعافر
راح و خلى قلبي دايب
خد طريقه قام و سافر
فاتلي هم فراق كاويني
ناره فوق الإحتمال
ما تداويها أي كلمة
طارحة فيا 100 سؤال
ليه تسيبني
ليه تخون العهد بينا
و برحيلك دا تفارقني
ليه بتكسر ضهري بيك
ما أنت كتفك كان ساندني
مين يقولي تاني بعدك
ياللا بينا نروح نعزى
ياللا بينا نروح نبارك
مين هياخد تاني إيدي
و ف طريق الخير نشارك
كنت أبويا و كنت أخويا
و كنت صاحبي
وقت ضيقي و وقت فرحي
كنت تيجي جري ليا
حتى لو هتجيلي تِحْبي
كان في تعبك ليا راحتك
كان أماني و أنت جنبي
كنت باسكن بين ضلوعك
و أنت بيتك جوة قلبي
هي دي الدنيا و غرورها
كاسها بين الخلق داير
لما أمر الله يجيلها
حكمه فوق الكل ساير
عالصغير و الكبير
كله جاي لعتبها زاير
روح و سافر بالسلامة
سيرتك الحلوة ما بينا
لك دموعنا و بدعانا
تبقى رحلة أخرها جنة
تلقى فيها كل حاجة
راحة من بعد الشقا
و انتظرنا يوم ما نيجي
دا الفراق بعده اللُقا
دا الفراق بعده اللقا
أحمد رجب النمر
#الوداع
#أحمد_رجب_النمر
ليست هناك تعليقات