وبترحم علي ماضي رضا أبو الغيط

 

وبترحم علي ماضي
ماهوش راضي يعود تاني
وبستني ف أولادي
يكونوا الزاد وزوادى
وفجر جديد يجمعنا
ويسكن ضيه أركاني
وصبح نهار يكون كمنار
ينور قلب وجداني
يشيل الهم من جوه
بكل العزه والقوة
ويقتل كل أحزاني
يقيد الشمع ف عيوني
ويزرع ليا بستاني
ويترحم علي ذكري
وميت فكره ف أحضاني
يعدي الصعب فوق ضهرى
ومن بدرى
نعدي ....... برنا التاني
ومن تاني.... تعود لينا
أمانينا
ولون الفرحه اللي وحشاني
ونتقابل مع خوفو
ومن خوفه
ينادي كل خلانه و خلاني
ونتقابل مع احمس ..
مع مينا...............
وكام مينا.... تجمعنا
تداوي فينا أوجاعنا
وتمسح.م العيون دمعه...
وتتسرسب كل احزاني
وتبقالي ف الحياه سندي
ايدين جدى اللي شيلاني
وحاسه بي
وحاسه بناسي.. وأحبابي
ايدين جدي اللي مش ناسي
يحني ايدينا من نصره
بلون عصره
وايد بلدي اللي شغلاني
ونستني صبح بيشقشق
و يتحقق
معاه الحلم من تاني
وأشوف الشمس فوق أرضي
بتتمخطر ....بلون وردي
وفوق خدي
بتبدر...... وردها الازهر
بريحة المسك والعنبر
وفل أبيض ..... علشاني
ومن فرحي
أداوي..... بالهوي جرحي
واعيش العمر وأتهني
ف ميت جنه
ف نن عيونها اللي عجباني
وأسهر ليلي وياها
أداعبها ........وألاعبها
تداعب قلبي بهواها
وأهواها .....وتهواني
ويسكن قلبي جواها
يامحلاها
بلون الطرحه فوق راسها
بلون فرحة قلوب ناسها
وحراسها
اللي بتصونها ..وصيناني

****"*******************
رضا أبو الغيط