تعالى نقعد على جنب = قلم الراقي : منير خاطر --- تحياتي جدو عبدو
تعالى نقعد على جنب
وقطع لنا شقة بطيخ
ناس تدفع دولارات فى البمب
وفلوس تولع فى الصواريخ
والناس ياعينى ملهاش ذنب
الصوت فى دماغهم زى السيخ
الواد بنجيبله بالدسته
علشان يقرف كل الحته
وكل دقيقه نسمع طاخ طيخ
والبمبه تطيرلو عين
ونحتار نجرى بيه على فين
طنطا وللا كفر الشيخ
فين العيب متعرفش تحدد
فى الحكومه وللا المستورد
وللا بياع النفافيخ
يشترو الدولارات بالغالى
ويستوردوا بفلوسنا تسالى
والصين تطلع للمريخ
قلة عقل ياناس وضمير
وناس بتغرقنا فى البير
علشان تتأنتخ أنتيخ
نشحت الفلوس م الغرب
ونستحمل على راسنا الضرب
ونجيب بيها م الصين شخاشيخ
لو رجعوا جدودنا الفراعين
هيقولوا علينا مجانين
وينزلوا فينا توبيخ
منير خاطر
ليست هناك تعليقات