(( يعد الغياب )) للشاعرة ~~~~~ فاتحة الفتنان
بعد الغياب
======
بعد غياب
ضوى بين النجوم هلال
جاي بريح عليل
عطر ب نسايم الرحمان
يداوي .....
غصة الروح الشاركة
يروي جشان بالذكر
عوافي كادية ب لحزان
خلخل لكلوب الناسية
ماشية ف بحر الدنيا
ب سفينة بلا مقادف
على وطا حمري
لا شجر ثامر ولا نوار
لخسارة جرت الرباح
وبقات الحيرة ف لعقل عالقة
من لعباثة وكاس الشماتة
راسمة ف لكلوب ندامة
ف عز البرد لاهبة
ف صمايم
الروح بالبرد جامدة
.......................
ناديك
نلاغيك
ناجيك
يا خالق لعباد
تسلبت
ولكلب مكسور
من جهلي معذور
ناجيك
يا مفاجي لكروب
تواسي
برحمتك داوي لعطوب
المدفونة ف لدواخل
مسكونة ب سواكن الحال
من العثرات اللي شلُّوالخطوات
من شلا طيحات
يارب شرح صدور
زول لحقاد
خلي العطفة ورود
......................
يا هلال الثوبة
لا تزرب وتهجر
ر نورك
خل عبوس الليل نهار
والظلام منارا
وعلى كلوب البشر
اعظم بشارة
فيقتي دواخل لحشا
ناجيك
ناديك
يا الرحيم
الغفار
تعتق رقابنا من النار
تغفر ذنوب من غفلتها
جرت الرجل للزلات
هجرت الصلاح
وتبعت سيول لهبال
من التيه تلفت الطرقان
عدم لعقل
تكبل اللسان من كلمة صدق
ولات حنضل ف شبح عسل
تزرع الشوك ف لعطوف
هيجت ب لغا لهتوف
ناجيك
ف لفياق
ف نعاس
بين ركعة وسجدة
لك بالصفا خاشعة
تحي كلوب نابضة
ب لمحبة والنقا
من بعد المحنة
تمحي بالبسمة
الدمعة الهارقة
تهون الحياة وعذابها
ويزهر الوعد
اللي فيضو الهم ببلاه
..........................
نترجاك
لا تهجر وتعطي ب الظهر
وتخلي النفوس
بين الفرحة والحيرة
اشنو حصدات
ف هاد الشهر
فاتحة الفتنان 22/06/2016
ليست هناك تعليقات