صباحك نادي يا بلادي \\\بقلم الشاعر رضا ابو الغيط
صباحك نادي يا بلادي
صباحك نادي يا بلادي
ياست الكل
صباح طاهر ومش عادي
بلون الفل
صباح المسك والعنبر
علي زرعه بلون أخضر
علي ضحكه بتتمخطر
علينا تطل
صباحك نادي يا بلادي
ياست الكل
صباح الخير يا فلاحنا
يا بلسم ضيقنا وجراحنا
يا طرح الخير ف حلق الطير
يا قلب حنون مريحنا
صباح ومعاه سواقي تدور
وتروي .....بالمحبه البور
صباح الخير صباح النور
صباح الخير يا فلاحنا
يا سيد الكل
صباحك نادي يا بلادي
يا ست الكل
صباح الفل عمالنا
يا فرحة بكره وأملنا
يا صبح وجاي من النجمه
يشيل كل الهموم عنا
صباح مرتاح ومش حاير
ما دام كل المكن داير
وطارح فرح لعيالنا
صباح نادي بيهنا لنا
وزي الفل
صباحك نادي يا بلادي
يا ست الكل
صباح أبيض بلون فرحي
صباح اخضر بلون طرحي
صباح متحني حنيه
يشوفه الكف ف ايديا
بلون دهبي ده لون قمحي
سنابله بكره ها تقضي
بطون الكل
صباحك نادي يا بلادي
يا ست الكل
رضا ابو الغيط
ليست هناك تعليقات