(( يوميات فلاح )) للشاعر ~~~~~ محمود صلاح السيد

*****((((يوميات فلاح))))*****

من البدريه والدنيا منديه 

أصلى الفجر حاضر

 وأرجع وش الصبحيه 

والعصافير على الشجر بتشقشق

ألبس الجلابيه وأحط على راسي

الطقيه وألف عليها شال أو كوفيه

وأروح لغيطي وأنا راكب ركوبتي

الوفيه

وساحب بأيدي راس مالي من غنمي ومواشيه 

ومعى فطارى فى لفه رضا وفضل من ربى لقمه هنيه

تكفي من الحبايب مايه وتفيض بالبركه وتزيد

أفطر أنا وجيراني بالهنا والشفه مترح ما يسري

يمري

أحلى فطار وسط الزرع والخضره الذكيه

والنسما تنعشنا وتهفهف على راسنا ونحكي حكاوينا

مايحرمنا ربنا من لمتنا وسعادتنا وبساطتنا

ونشرب شوية ميه معين من الطرومبه أحسن من الميه

اللي فى أزازه بلاستكيه وبتقولوا عليها ميه معدنيه

ونولع شوية أوالح على حطب ونقعد جانب  الركيه  ونعمل شوية شاي فى الخمسينه ونضحك ضحكه صافيه والدنيا حوالينا دافيه ولافيه زحمه ولادوشه

ونقوم نعمل أشغالنا من سكات ونأكل ونشبع بهايمنا 

ونتوضى ونصلى أوقاتنا فى المصليه

وفى وش المغربيه نرجع على دارنا ودوارنا ونتعشى ونصلى العشا ونريح لحد الفجريه جتتنا 

هى دى كانت عشتنا اللي أتبدلت وأتغيرت بفعل المدنيه اللي أكيد لها جوانب أيجابيه وسلبيه 

ومع تغير الأحوال والأفعال تغيرت عيشة الفلاح 

من أحسن حال إلى أسوء حال رغم نسبة التعليم والتنوير أصبح الفلاح عليه ديوان والمحصول مابيجبش همه وتكلفته ولا لاقي حد يشترى زرعته

والأرض أصبحت عبأ وعاله عليه يصرف عليها ولا على العيال اللي ضاقت عليهم وسافروا وسبوها عايزين يكونوا مستقبلهم الأرض لوحدها متأكلش عيش فى زمانهم لازم يكون فى دخل جانبها يدارى على مصارفها وخسارتها مسكين الفلاح اللى عاش ومات فلاح ميعرفش غيرها محدش كان حاسس ولا دارى به 

وكان مظلوم من كلام الناس اللي قالوا على عيشته

محلاها عيشة الفلاح مرتاح وبياكل تفاح 

وهو مات شقيان مديوان والأرض جابت له المرض 

والورثه بيقسموها بينهم دى بكام ودى بكام 

عبره وعظه أيها الإنسان وعجبي!!!

بقلمي / محمودصلاح السيد14/5/2016